Liadüra da chaltschina cunvenziunala
Liadüra da chaltschina per l’intern e l‘extern in differentas structuras cun pigmaints da culur natürals masdats laint o cun pittüra da chaltschina fresco.
Zini Restoraziuns
La firma es gnüda fundada dal 1982 da Silvio Zini sco firma singula. Dal 2020 es l’impraisa gnüda surtutta dad Armon Thomas cun tuot ils collavuraturs da plüs ons e müdada intuorn in Zini Srl. Armon Thomas es eir il manader da gestiun da la firma.
Daspö il principi da l’actività da fabrica dal 1982 d’eira la restoraziun da chasas veglias il plü grond interess da la firma ed in quist sen vain manada inavant la Zini Srl. Il sez as rechatta a Sclamischot Strada e Silvio Zini es inavant activ sco collavuratur liber.
Cumpetenzas
Fuond cun molta da chaltschina
Il fuond cun molta da chaltschina sputtà e gualivà po gnir elavurà a la structura giavüschada. I vegnan ütilisats unicamaing materials indigens (chaltschina e sablun/masdügl da glera). La surfatscha vain elavurada cun savun lom natüral.
Restoraziun da la liadüra
Üna sanaziun cumpiglia lavurs da reparatura e da sgürar la liadüra vi da surfatschas da liadüra veglias resp. degnas da mantegner a l’intern ed a l’extern da l’edifizi.
Conservaziun da ruinas
Il böt da la conservaziun da ruinas veglias es cha quellas giajan plü plan in muschna. I’s tratta da las seguaintas masüras da fabrica: Consolidaziuns staticas vi da fundamaints, vouts ed erupziuns plü grondas, consolidaziun da las curunas dal mür e frenada da l’erosiun da suringiò e conservaziun da las surfatschas da las paraids cun schmoltar chavas da molta schlavadas oura e sgürar la liadüra.
Reconstrucziun d’edifizis
Mürs da crappa in muschna d’edifizis o barbachans (Stützmauern) vegnan refats da nouv unicamaing culla crappa avantman e cun molta da chaltschina e schmoltats cun molta da chaltschina.
Sanaziun da bügls da beton
Bügls chi cuorran o chi sun donnagiats pervi d’influenzas externas vegnan sanats cun premura. La part interna chi cuorra vain stoppada e profilada cun molta. Illa part externa vegnan dons reparats ed adattats a la liadüra existenta cun molta fina.
Salaschada cun chavas da molta da chaltschina
Sco basa vegnan schlovats craps raduonds indigens in glera o in molta. Las chavas tanter ils craps vegnan implidas cun molta da chaltschina e barschunadas cur chi sun süttas.
